8年前既今日, 係我地一齊既日子, 話咁快就8年喇, 8年真係唔係短既日子, 我地經驗過好多事, 一齊來到今日, 可以搵到一個人同自己相愛8年, 真係好難得而且好幸福既事! :)

今年我地進行左一連串冇咩特別又開心既慶祝活動, 8月17日既晚上, 貓仔一放工, 我地就出發上深圳啦, 首先去左大漁食日本野, 之前已經聽好多人講好好食, 今次終於都試到啦, 食物真係好新鮮又好抵食, 不過味道就冇咩驚喜, 同埋地方略嫌污糟, 但真係好抵呀! 食完之後, 就去左dum骨, 咁就過左1晚啦!

8月18日, 我地去左東部華橋城, 呢度好靚好似Disney, 其實都好值得去, 不過由於仲好新, 好多機動遊戲都未開, 而且天氣真係好熱, 我地都好辛苦呀! 建議大家有興趣可以出年年頭去, 到時應該會起得7788喇! 我地係呢度影左好多靚相, 雖然冇咩野玩, 但我已經好滿足! 我好鍾意同老公帶住相機腳架周圍去影相, 呢D相間中睇返好值得懷念呀:D

玩完之後, 收到一個意外電話, 就係我之前見左一份工係英文學校做校長既PA, 佢打來話正式firm左我啦, 雖然呢間係一間細機構, 我諗PA咩都要做, 但係我覺得好有挑戰性, 因為個校長好嚴, 要求好高, 而且到時會有一個Assistant會report俾我, 我從來未試過管人架, 所以我諗我真係要樣樣野都做得好好, 唔好出錯, 而且做PA有機會做好多Confidential既野, 其實都係我好想搵既工作, 希望係度做可以鍛鍊到我進步好多, 對第時再搵工會好有幫助啦! 校長, 我要挑戰你!

返到香港之後, 我地就係屋企樓下食左餐日本野, 其實日本野係我地至愛, 所以成日都會食, 而且由於要趕去睇馬術, 所以係樓下食就算啦, 一樣開心!

今晚係第2次睇馬術, 上次睇盛裝舞步真係悶到喊, 今次睇障礙賽真係精彩好多, 起碼可以歡呼, 同埋睇得明, D馬真係跳得好高呀, 每次佢跳既時候, 都鄧佢地好緊張! 今晚係決賽, 最後由美國隊得到冠軍!

8月19日, 今日我同老公仲有爆谷仔一家人去左游水, 自從有左爆谷之後, 屋企有左生氣, 爆谷就好似個小朋友咁, 周圍跑來跑去, 咬玩具玩, 有時會倒亂, 但見到佢咁傻又會好自然唔嬲佢, 我同老公都係當佢真係個人仔一樣, 我地今次帶佢去沙灘, 佢都好開心, 今日天氣超好而且冇咩人, 我地係大海中暢泳, 好寫意!

夜晚我去左新公司度簽約, 好開心終於搵到另一份工喇! 希望呢份工我會做得開心, 但我諗會好辛苦, 希望我應付得到同埋要捱過頭幾個月辛苦既日子, 我要加油呀!

老公, 8週年快樂! 希望同你會有更多既8週年, 來緊既日子都可以同你渡過啦!

返左新工接近一個星期, 我真係好唔鍾意呢個環境呀! 雖然係大公司, 但原來佢地既思想比起好多細公司還要封閉, 由於俾Starbucks寵慣左, 我真係好唔適應, 因為公司太大, 所以好多工作都分得好細, 而我既職位, 簡直係荒謬! 萬幾蚊請個人返黎既工作, 就係訂咭片信紙! 真架! 呢個位既工作9成時間都係做呢D野! 我返左幾日, 每一日都覺得自己既存在係無聊, 係笑話! 而我, 呢2日又再次開始返搵工既生涯! 返住工搵工真係好唔方便, 唔係間間公司都肯就我放工去見工, 就算肯, 放左工去都已經好累, 點都會影響到表現! 我真係好想辭左職先, 但係諗左2日, 都仲未行動去遞信, 我就係咁, 明明心裡面有個答案, 但硬係冇勇氣去做決定! 本來諗住搵到一份工都OK, 點知入到去發現呢間公司完全唔適合自己, 我真係好想快D離開呀:(

突然我問自己, 究竟工作係為左咩呢? 為左想係事業上有一番成就? 為左消磨時間? 定係淨係為左搵錢改善生活質數? 我自己都唔知道! 我唔係希望可以出人頭地, 但都希望可以係某個行業上可以去到中層既地位, 雖然身邊好多朋友都成日會覺得我好幸運, 一直以黎工作上都唔會太辛苦人工又高, 但係我仍然有不滿既地方, 搵到人工高既, 又嫌福利唔夠好, 搵到人工高福利好既, 又嫌冇進升機會, 到有進升機會, 又擔心自己應付唔黎錯失機會。係我要求太高嗎? 係我太麻煩嗎? 究竟工作既真正意義係咩呢? 係呢個時勢, 係咪搵份安安定定人工唔錯既工就已經足夠呢? 學咁多野, 咁辛苦都係為錢為兩餐者, 倒不如是但搵份人工唔錯又舒舒服服既工咪得囉, 我要抱住這個態度嗎?

今日LUNCH同舊同事食飯, 終於有"輕鬆一下"既感覺, 雖然係新公司冇咩野做, 做既野又完全零難度, 唔經唔覺, 準時收工果隻! 但我仍然有一股無形既壓力, 但係壓力來自咩呢? 我真係講唔出, 只係覺得一離開呢個地方, 我即時覺得輕鬆晒! 同舊同事食飯途中, 佢突然問左一個問題, 問我其實係Starbucks係咪走得好唔開心, 唔滿意Contract提前完結, 佢話好唔開心竟然果時佢坐我隔離, 都feel唔到我唔開心, 而最後係由其他人口中聽返黎, 佢即時問自己係咪冇關心過我, 點解佢會唔知道, 我聽到之後覺得好感動, 好溫暖, 係Starbucks離開時, 我冇乜同其他人講我既感受, 但確實地我真係好不滿的, 我係不滿公司既做法對我好唔公平, 平時我係一個好善忘既人, 唔開心既事第2日就唔記得, 但係呢件事, 真係令我唔開心左一段時間, 一直以黎我都好幸福, 呢個算係我人生中一個幾大既波折。本來以為搵左另一份工, 有個好既開始, 但係我真係完全適應唔到外面既工作環境, 以前我成日都好想離開Starbucks, 但係依家我好懷念Starbucks!

可能好多人都會覺得我係一個成日都好開心既人, 因為我所記載的, 大部份都係我開心的, 認為值得記念的, 其實係唔開心既我選擇唔記住。這算是自欺欺人嗎? 哈哈! 可能係好事黎既呢! 相信最清楚我既人, 最聽我發得多牢騷既人, 非我老公莫屬, 其實我唔係大家諗得咁樂觀, 事事都咁如意呢! 我都要好多謝一D不斷比好多意見我既朋友, 我最大既弱點, 就係我每次遇到問題, 我都決定唔到, 渣唔定主意, 好似我應唔應該辭職咁, 我諗左2日都仲係未決定到! 好多謝朋友們咁了解我, 不厭其煩咁答完我一次又一次, 聽我不停三番四次咁唉聲嘆氣, 係我煩惱既時候, 我真正感受到你對我既包容同鼓勵, 真正知道你地係我既好姊妹!

究竟我幾時先可以搵到份滿意既工作呢? 定係我應該改變我對搵工既態度同要求呢?

題外話: 琴日聽KAY首"囍帖街" 雖然同我既戀愛狀況有好大出入, 但唔知點解對首歌好有感覺, Wyman既歌詞總會帶人進入一個小故事裡面 :)

呢部機相信有D朋友都有聽過, 一年前試過有推銷員上黎屋企清潔+推銷過一次, 果時已經覺得呢部機真係非常神奇, 真係有一剎那想買, 不過由於太貴, 所以冇買到。想不到一年後會再由老公既朋友再次推銷到我地家, 今次我同老公都係屋企, 同上次一樣, 推銷既口吻+對白都係一樣, 清潔左一個鐘之後, 就開始SELL我地啦, 雖然我覺得真係好好, 不過因為部機太貴, 所以我都諗住唔買, 但係今次竟然係老公抵受唔住, 好想買左呢部超神奇機器...拉据左半個鐘左右, 老公終於拎出信用咭, 買左佢啦! 大家知唔知部機幾錢? 係HKD$20,000!!!!!!!!!!!!

不過部機有8年保養, 除返開其實都係$200一個月, 不過有左佢之後, 屋企空氣真係清新左, 麈都少左好多, 而且因為新屎坑, 我地都勤力左清潔! 哈哈! 今日我地用左15分鐘, 清楚左床肉, 梳化, 窗台墊肉, 大家睇下以下既測試結果, 千祈唔好驚訝:

使用前

使用後

就算你屋企平時打理得幾乾淨, 幾勤力清潔都好, 出黎既效果都會一樣, 真係勁嚇人!